Предлог-законот за изменување и дополнување на Законот за лична карта, во прво читање денеска е пред Собраниската Законодавно-правна комисија.
Личните карти кои го содржат натписот „Република Македонија“, издадени до денот на почнувањето на примената на овој закон, ќе важат до истекот на рокот на важење кој е наведен во личната карта, најдоцна до 12 февруари 2024 година.
„Со оглед на фактот што Република Северна Македонија е мултиетничка држава, во која живеат припадници на повеќе етнички заедници, а во релација со донесувањето на Законот за употреба на јазиците („Службен весник на Република Северна Македонија“ бр. 7/19), истите правото на издавање на личната карта (во поглед на јазикот на кој ќе се издава образецот на личната карта, како и јазикот на кој ќе се испишуваат податоците во неа), можат да го остварат и на јазикот и писмото кои тие ги употребуваат.
Во овој контекст, укажуваме дека со предлагањето на Законот за изменување и дополнување на Законот за личната карта се цели кон проширување на можностите кои би ги имале припадниците на заедниците во процесот на издавање на личната карта, а во насока на јазикот на кој ќе им се печати образецот на личната карта, како и на јазикот на податоците кои ќе се впишуваат во неа.
За таа цел, се предлага донесување на Закон за изменување и дополнување на Законот за личната карта“, се вели во законските измени, кои се на дневен ред на Законодавно-правната комисија.
Претседателот на Комисија за политички систем и односи меѓу заедниците Соња Мираковска за МИА изјави дека овој закон е предлог на Министерството за внатрешни работи.
„Измените кои се внесени во овој закон се однесуваат на можноста граѓаните кои не се Македонци, а се повеќе од 20 отсто, да може во личната карта податоците да бидат впишани по службена должност и на нивниот јазик. Исто така и лицата кои не се Македонци, а се помалку од 20 отсто, на нивно барање ќе може податоците да им бидат впишани и на јазикот кој го зборуваат“, појасни Мираковска.
