Засега осудениот Груевски се бара со национална потерница која вчера по барање на судот ја распиша МВР. Полицијата го бара осудениот Груевски на територијата на Република Македонија.
„Никола Груевски, од татко Тало и мајка Надежда, роден на 31.08.1970 во Скопје се бара за пронаоѓање и приведување заради извршување на казната затвор во траење од две години за сторено кривично дело- примање награда за противзаконито влијание од чл. 359 ст.2 од КЗ“, е тексот со кој е проследена фотографијата.
Потерницата следи откако во петокот беа направени три обиди од судски курири да му ја врачат одлуката на жалбата на Кривичниот совет за одложување на затворската казна, а и такви обиди беа направени и вчера.
Доколку судијата за извршување на санкции процени дека има потреба и од меѓународна потерница, тогаш ќе треба да ја испрати наредбата до МВР, од каде пак потоа ќе треба да биде распишана потерница и осудениот да се бара и надвор од Македонија.
