Досегашниот предводник на Металург 2, Оливер Димитриоски, е нов тренер на РК Прилеп. По решавањето на финансиските проблеми што го доведоа во прашање и настапот на прилепскиот клуб во Супер лигата, дојде до промена и на клупата.
„Успеавме да се договориме со општината. Најдовме заеднички јазик и ќе бидеме финансирани од локалната самоуправа. Имаме и промени така што ќе имаме нов тренер. Ја завршивме соработката со Ице Соколески, а нов тренер на клубот ќе биде Оливер Димитриоски кој доаѓа од Металург“, изјави претседателот на клубот, Александар Мариноски.
Прилеп остана без поголемиот дел од првотимците во есенската полусезона. Јанчев, Рајатовски, Јовановски, Вешоски, Ѓорѓиески, Тренчевски нема да бидат дел од прилепскиот тим, кој во последен момент со помош од Општината, се реши да ја продолжи сезоната до крај.
