На дводневната партиска фарса во скопски „Холидеј Ин“, фарса каква Македонија досега нема видено, беа искажани купишта лаги за „невидените“ постигнувања на градоначалниците на ДПМНЕ кои за 4 години ги уништија општините со кои раководат, велат во својата реакција од ОО на СДСМ Прилеп по отчетот за сработеното за изминативе 4 години, на градоначалникот на Прилеп, Борче Јовчески.
„Борче Јовчески, човекот кој ќе остане запаметен како најнеспособниот градоначалник во историјата на Прилеп, се надмина себеси во искажувањето невистини за (не)сработеното во неговиот 4-годишен мандат.
Истиот оној Борче Јовчески кој за 4 години потроши над 100 милиони евра, во намера да му се додвори на партискиот лидер искажа тешки лаги и небулози, од кои им црвенееја ушите и образите на луѓето од неговото опкружување.
Само човек кој е “опериран“ од срам може да каже дека асфалтирал 80 улици, дека изградил нова градинка, фабрика за селектирање на отпад и училишна спортска сала, дека обезбедил 6.000 бесплатни униформи за учениците од основните училишта.
Кога Јовчески и ДПМНЕ зборуваат за 5 нови минибуси за јавниот градски превоз, тие всушност мислат на донацијата од раскантани полуисправни возила стари по 20 и кусур години кои од сите страни испуштаат масло и нафта. За што, впрочем, најдобро сведочи маслосаниот и уништен тротоар пред влезот на зградата на Општина Прилеп.
Кога Јовчески и ДПМНЕ зборуваат за 17 нови проекти вредни 8 милиони евра, чија реализација ќе започнела во втората половина на 2025 година, треба да погледнат во календарот и да видат дека за некој ден започнува септември, 9-тиот месец од тековната година, а од фантомските проекти нема ни ал ни абер.
Овие и останатите други „реализирани проекти“ напишани во табулата раза наречена „Отчет на Борче Јовчески“, ги има само во неговата фантазија и никаде на друго место!
Реалноста е поразителна и за него, и за неговата партија, но најмногу за граѓаните на Прилеп. Со Јовчески и ДПМНЕ, прилепчани плаќаат поскапа вода, градски превоз и паркинг, повисок данок и комунални услуги.
Со Јовчески и ДПМНЕ прилепскиот спорт го допре дното, младите останаа без Младински културен центар, населените места се целосно забаталени. Јовчески и ДПМНЕ јавните претпријатија ги претворија во загубари со долгови од над 2 милиони евра, од Прилеп направија небезбеден град во кој насилството и запалените возила станаа секојдневие.
Во 4-те години власт на Јовчески и ДПМНЕ, дивото градење доживеа преродба, јавните површини се узурпираа, а по мрачните, раскопани, нечисти и празни улици крстарат само глутници кучиња скитници.
Конечно, ДПМНЕ и Јовчески ветија модернизација и напредок, а оставија урбанистички хаос, економски пустош и финансиски обврски од 6 милиони евра. Доста беа манипулации, лаги и измами. На Прилеп му треба власт која ќе работи во интерес на прилепчани, а не власт која на граѓаните ќе им го краде времето, парите и надежта. Прилеп треба и мора да го вратиме на патот на развојот и просперитетот“, велат во соопштението од ОО на СДСМ Прилеп.
