Синоќа во Прилеп во кафе барот ONIX, по повод празниците, се одржа креативен настан под крилото на новата уметничка платформа АРТ ХОСТ. На овај настан учествуваа околу 40-тина креативци кој ги испишаа боите на љубовта и виното врз платното, заедно со музиката на Акустик Трио. Идејата на АРТ ХОСТ е и понатаму да ги поддржува љубителите на уметноста и со својата програма да продолжи да ја оживува уметничката култура во градот.
АРТ ХОСТ е платформа која овозможува организирање разновидни забавни и едукативни настани, наменети за поттикнување на имагинацијата, креативноста и слободното творечко изразување на заинтересираните креативци. Зад платформата стојат три успешни креативки – Анита Јовеска, Маја Најдоска и Викторија Димеска – кои со години, преку својата неуморност, отпорност и автентично творештво, создаваат уметност, го промовираат своето дело и активно учествуваат во градењето на современата ликовна сцена и критика.
Визијата на АРТ ХОСТ е создавање творечко, уметничко и интелектуално јадро каде што креативноста слободно и непрекинато ќе се развива, ќе се раѓаат нови идеи и ќе се поместуваат границите на ликовната уметност.
Мисијата на АРТ ХОСТ е да охрабрува и овозможува креативна слобода на уметничките гласови преку организирање динамична и инклузивна платформа. На оваа платформа, уметниците и учесниците ќе ја изразуваат својата креативност, ќе се поврзуваат меѓусебно и ќе поттикнуваат трансформативен културен дијалог. Стремиме кон уметничка иновација и соработка преку имерзивни забавни настани и едукативни искуства што ги збогатуваат животите, ја слават разновидноста и градат вибрантен, самоодржлив креативен екосистем.
Целите што ќе се реализираат преку програмата на АРТ ХОСТ се:
- Промовирање слободно уметничко изразување,
- Поттикнување на публиката кон активно учество во ликовната сцена,
- Поддршка на уметниците во подем и зајакнување на врските со заедницата преку организирање настани за креативна ликовна соработка,
- Сочувување на културните вредности и создавање простор каде што ќе се негуваат и традиционални уметнички форми и современи мултидисциплинарни ликовни практики,
- Развивање можности за ликовна едукација,
- Воспоставување соработка со локални бизниси и културни институции за проширување на ресурсите и
- Привлекување нова публика преку организирање разновидни креативни искуства.
Потребите за создавање уметничка платформа од забавен и едукативен карактер се многубројни:
- Создавање простор каде што уметниците и креативците од различни дисциплини ќе можат да ја промовираат својата уметност, да се вмрежуваат, соработуваат и да се развиваат професионално,
- Надминување на недостигот од општествен поттик за соработка меѓу уметници од различни дисциплини и публиката, што би довело до иновативни проекти и уникатни уметнички искуства,
- Градење интелектуално јадро за разновидна публика, каде што ќе се поттикнуваат дијалози за уметноста и културна размена,
- Истакнување на современите ликовни движења и разновидните културни изразувања што го збогатуваат културното ткиво на заедницата,
- Поттикнување на економскиот развој преку соработка со локалните бизниси,
- Користење на уметноста за решавање социјални прашања и поттикнување позитивни општествени промени,
- Обезбедување креативна платформа каде што поединците ќе можат да ги изразат своите емоции и искуства преку разновидни уметнички активности, придонесувајќи кон нивниот личен развој и благосостојба, и
- Организирање хуманитарни активности за подобрување на квалитетот на живот во заедницата.
Во претстојниот период, нашата ликовна платформа ќе понуди богата и разновидна програма која вклучува: интерактивни работилници, „paint and wine” настани, специјални фестивни настани, мастер работилници, тематски ликовни изложби, тим билдинг активности и други возбудливи настани што ќе ја негуваат соработката меѓу уметниците и публиката.
