Почитувани прилепчани, почитувани граѓани на градот херој, градот во кој пукнала првата пушка, градот кој пред 81 година го означил почетокот на народното востание за конечно ослободување на Македонија од окупаторот.
Од овој ден, македонската историја е побогата за уште едно херојство на македонските борци кои тогаш водени од идеалите за слободна и суверена македонска држава, беспоштедно започнуваат борба која подоцна ќе го донесе големото ослободување на нашата Македонија.
Носејќи ги на грбот илјадниците жртви на војната, а со единствена мисла за слобода, храбрите македонски борци во предвечерието на 11 октомври со напад на тогашната полициска станица, Участакот, ја започнуваат борбата против фашистичкиот окупатор, благодарение на која ние денес имаме суверена и независна Република Македонија.
Овој празник, оваа победа на македонскиот народ е светла точка во нашата историја, но исто така поттик и мотив сега и во иднина цврсто да застанеме кога се во прашање националните интереси, доколку сакаме да го продолжиме патот кој е започнат пред 81 година, а со тоа да го зачуваме достоинството на Република Македонија!
Нека ни е честит и вековит 11 Октомври, Денот на народното востание!
