Во Алжир се урна воен авион, во близина на воената база Боуфарик. Во несреќата загинаа 257 лица, од кои повеќето војници и членови на нивните семејства.
Несреќата се случила во околу 3 часот утринава по локално време, а според локалните медиуми урнатиот авион е произведен од руската авионска компанија Иљушин.
Авионот паднал на фарма во близина на автопат кратко време по полетувањето, на 50 километри јужно од главниот град Алжир, објави телевизијата „Ал-Хадас“.
Најверојатно причина за несреќата е лошото време во областа, со оглед на тоа што во моментот на несреќата дувал силен ветер и имало интензивни врнежи од дожд. Сепак, причината дополнително ќе се испитува.
Пред четири години во Алжир се случи слична несреќа, кога се урна воен авион во кој се наоѓаа војници и нивни семејства. Тогаш загинаа 77 луѓе.
