Државната химна повторно ја бранува македонската јавност. Пејачката Тамара Тодевска синоќа на приемот во Амбасадата на САД во Скопје по повод 4 Јули, Денот на независноста не отпеа четири стихови од официјалната државна химна, притоа изоставајќи го делот каде се спомнуваат народните херои.
Таа синоќа го испушти делот со „Гоце Делчев, Питу Гули, Даме Груев, Сандански!“ којшто следува по стиховите – „Одново сега знамето се вее, на Крушевската Република!“, а во нејзината изведба го немаше ниту делот „Горите Македонски шумно пеат, нови песни, нови весници!“, пред „Македонија слободна, слободно живее!“.
Наместо тоа, пејачката ги испеа стиховите од старите верзии на химната – “Старо младо машко и женско, на нозе се кренало!” и “Не плачи Македонијо мајко мила, Крени глава гордо високо”.
По ваквиот инцидент и острите реакции од страна на јавноста, Тамара Тодевска објави извинување на нејзиниот Фејсбук профил, во кое објаснува дека таквиот пропуст бил ненамерен и поради „напливот од емоции и од целокупната еуфорија“.
„Почитувани, Дозволете ми од дното на моето срце да ви се извинам за вчерашната грешка.
Не постои поголема чест за еден уметник од пеењето на националната химна и токму поради тоа и ја прифатив поканата од амбасадата на САД.
Не постојат зборови со кои можам да ја опишам мојата тага поради пропустот што го направив при пеењето на химната.
Понесена од емоции и од целокупната еуфорија, за жал, ненамерно изоставив дел од химната.
Уште еднаш ви се извинувам за оваа грешка и се надевам дека ќе најдете простор во вашите срце да ми простите.
Со почит, Тамара“
На социјалните мрежи во врска со оваа грешка се огласи и американската амбасада во Скопје.
„Имаме длабока почит кон традициите, историјата, хероите и иднината на нашиот пријател, партнер и сојузник Северна Македонија. Разбираме дека во емотивни моменти ненамерно може да се случат грешки, но им се заблагодаруваме на нашите пејачи за нивните прекрасни изведби“, објавија од амбасадата на „Твитер“.
Инаку ова не е прв пат Тамара погрешно да ја испее нашата химна. Оваа иста погрешна верзија ја испеа и на фудбалскиот натпревар на македонската репрезентација со Белгија во Скопје во март 2013 година.
