Поради алармантната ситуација во Прилеп со Ковид 19, секојдневниот огромен број на нови случаи на граѓани заболени од корона вирус, но исто така и секојдневниот голем број на починати лица градоначалниикот на Прилеп, Илија Јованоски телефонски ни истакна дека вечерва од Главниот кризен штаб и од Владата ќе побара воведување на дополнителни рестриктивни мерки за Прилеп. Утринава Јованоски за дел од медиумите изјави дека ќе побара локдаун или карантин за Прилеп, но потоа рече дека ќе ја почитува секоја одлука на Кризниот штаб, каква и да е таа.
„Ќе побарам од главниот Кризен штаб и од Владата на РС Македонија да има заострување на мерките и воведување на дополнителни рестриктивни мерки кои ќе се однесуваат на целата територија на општина Прилеп.
Дали тоа подразбира локдаун, или карантин за Прилеп?
Не сакам да преудицирам, затоа што ќе ја разгледаат целокупната ситуација и тие ќе одлучат што треба да направиме и јас тоа ќе го почитувам“, истакна Илија Јованоски, градоначалник на Прилеп.
Јованоски смета дека до ваквата драматична ситуација дошло поради непочитување на мерките од страна на дел од граѓаните.
„Дружењата, групирањата, неносењето на еден процент од граѓаните на заштитни маски, неодговорното однесување на еден процент од граѓаните“,
Токму поради неносењето на маски пред неколку дена актерот во прилепскиот театар Михајло Миленкоски бил претепан пред еден маркет во центарот на градот кога побарал од вработените да не пуштаат во објектот лица без маски. Лицето го слушнало тоа, го чекало Миленкоски пред објектот и го претепал. Иако од тогаш поминале 10 дена Миленкоски вели дека полицијата се уште немала превземено мерки против лицието.
„Во тој момент само што тргнав да бегам, дечкото ме фати за рамо, ме тргна и осетив силна болка во левиот предел. После тоа ништо не се сеќавам, се разбудив во прилепската болница, во хируршко одделение бев сместен. Имам скршен лев синус, правоаголно со вилицата и носот, имам и потрес на мозокот. Жално е во 21 век да имаме вакви примери на насилници кои што се чувствуваат како ова да е дивиот запад. Мислам дека треба полицијата да си преземи активности“, изјави актерот Михајло Миленкоски.
Инаку колку е драматична ситуацијата во Прилеп зборува фактот што само вчера од 15 починати на ниво на држава 6 мина беа од Прилеп, а имаше 83 нови случаи. Од почетокот на пандемијата во Прилеп се заразиле над 2600 граѓани, а починале околу 120.
