Градоначалникот на општина Прилеп, Дејан Проданоски синоќа го одржа својот отчет за досега сработеното во првата година од својот мандат, но и најави што сѐ прилепчани може да очекуваат во следните години.
Зборуваше за проекти кои ја менуваат сликата на Прилеп и создаваат услови за негови иден развој. Подобра инфраструктура, побезбеден сообраќај, уредени јавни простори, подобри услови за стопанството и други инвестиции.
„Тука сакам да ја спомнам рехабилитацијата на улиците во градското подрачје и рехабилитацијата на улиците во населените места. За реализација на овој проект од огромно значење за подобрување на патната инфраструктура обезбедивме околу 168 милиони денари средства од буџетот на Општина Прилеп, и ќе работиме и во наредните години да ја подобриме патната мрежа и да го олесниме движењето и функционирањето на нашите сограѓани.
- Комплетна реконструкција на улицата „Кузман Јосифоски“, решаваме проблем стар со децении. Проектот се реализираше со поддршка од Владата, преку Министерството за животна средина и просторно планирање, во вредност од 5.902.588 денари.
- Се реконструираше главниот транспортен цевковод што ја носи водата од резервоарот во Варош, при што старите азбестно-цементни и метални цевки се заменуваат со современи полиетиленски цевки. Опфатени се 300 метри главна водоводна линија Ф-315, како и дополнителни 140 метри секундарна мрежа Ф-63, со поврзување на куќните приклучоци.
- Рехабилитацијата на улицата, во должина од 300 метри и на површина од околу 3.000 квадратни метри, Општина Прилеп ја реализираше со сопствени средства.
- Фотонапонска централа на пречистителната станица. Станува збор за инвестиција од 10.137.176 денари, реализирана преку Министерството за транспорт. Поставена е фотонапонска електроцентрала со капацитет од 540 kW, со која се создаваат услови за производство на електрична енергија од обновливи извори за потребите на пречистителната станица на ЈКП „Водовод и канализација“. Со тоа ќе се намалат режиските трошоци за електрична енергија.
- Изградба на водоводна мрежа во Лениште и до манастирот „Св. Димитрија“ кај селото Селце. Проектите се реализираат преку Министерството за животна средина и просторно планирање. Вредноста на инвестицијата за водоводот до манастирот изнесува 9.779.604 денари, а за водоводот во Лениште 20 милиони денари. Со овие проекти трајно ги решаваме проблемите со водоснабдувањето и ги подобруваме условите за живот во овие населени места.
И ова не е сè што се реализираше во Прилеп во однос на инфраструктурата во текот на една година. Прилеп прави уште повеќе и тука не ја завршуваме нашата приказна за убав, модерен и функционален град.
Продолжуваме со реализација на конкретни проекти:
- Наскоро започнува реконструкцијата на улиците „Трајко Николоски“ и „Орде Чопела“ – капитални проекти со вкупна вредност од околу 180 милиони денари.
- Ќе бидат поставени полуподземни контејнери на 21 локација низ градот. Средствата се обезбедени преку Министерството за животна средина, во вредност од околу 18 милиони денари.
- Значаен проект е и изградбата на дел од улицата „Победа“, од крстосницата со улицата „Александар Македонски“ до крстосницата со улицата „Павел Шатев“, а втората фаза односно уште еден значаен проект е и изградбата на мост на истоимената улица. Вкупната вредност на овие проекти изнесува повеќе од 100 милиони денари, а ќе се реализираат преку Министерството за транспорт.
- Во моментов сме во фаза на јавна набавка, со цел да избереме изведувач за чистење на речното корито на градската река, за што имаме предвидено 3 милиони денари.
Од проектите што се подготвуваат, сакам да издвојам неколку:
- Oбиколниците Исток и Запад
- Проектот за комплетно инфраструктурно уредување на населбата Градина, чија реализација ќе започне до крајот на 2026 година
- Комплетна реконструкција на улиците Александар Македонски и Егејска
- Комплетна реконструкција, со подземна инфраструктура, на улиците Бистра Планина, Осоговска и Зеленгора
- Изградба на нови улици во индустриската зона кај „Комфи Ангел“
- Реконструкција на постојниот мост на градската река на улицата Цане Илиески
- Поставување фотоволтаици на покривот на ООУ „Добре Јованоски“ и Гимназијата.
Особено значаен проект е изградбата на нова училишна спортска сала во населеното место Мало Коњари, за што веќе имаме склучено договор со изведувач. Вредноста на проектот изнесува повеќе од 30 милиони денари. Оваа инвестиција е важна не само за учениците, туку и за жителите на Мало Коњари и околните населени места, бидејќи во овој регион досега нема училишна спортска сала. Со нејзината изградба ќе се создадат услови за одржување на наставата по физичко образование, спортски активности и настани, со што ќе се задоволат потребите на поширокиот регион.
Во тек е и изградбата на градски тоалети на три локации: во центарот на градот, реконструкцијата на тоалетите на Могилата и изградбата на нови тоалети кај стадионот со вештачка трева во населбата Типски.
Посебно внимание посветуваме и на изработката на нов Генерален урбанистички план (ГУП). Со неговото донесување ќе се создадат појасни и посоодветни услови за урбанистички развој, ќе се надминат постојните проблеми при издавањето дозволи за градба и ќе се овозможи проширување на градежниот опфат на Општина Прилеп за дополнителни 310 хектари. Ова е особено важно за идниот развој на градот, отворањето нови можности за инвестиции и планирањето на нови станбени, деловни и индустриски капацитети.
Прилеп е градот во кој живееме, градот во кој растат нашите деца, во кој ги создаваме нашите семејства, во кој се раѓаат идеи и се вложува труд. Градот во кој сакаме да има причина да се остане, можност да се успее и гордост да се живее.
Токму затоа, секоја одлука што ја носиме и секој проект што го започнуваме мора да има јасна смисла, да остави нешто вредно зад себе. Улиците, училиштата, спортските терени, јавните простори и сите инвестиции за кои зборувавме. Тие се дел од сликата за Прилеп каков што сакаме да го имаме утре“, истакна Проданоски.
