Судот во Драч му одреди мерка притвор на македонскиот државјанин Назиф Ајровски (40), возач на камионот во кој албанската полиција откри 324 килограми кокаин.
Како што пренесува Топ Чанел, најпрво рочиштето било одложено поради недостиг на официјален преведувач, а потоа судијата Реџеп Бектеши го потврдил апсењето во делот на кривичното дело „недозволена трговија со наркотични средства“ и му одредил мерка на безбедност „затворски притвор“.
Дрогата – кокаин во вкупна количина од 324 килограми и 400 грама, пакувана во 300 пакетчиња, е откриена на 18ти јуини во 22:30 часот во камион со македонски регистарски ознаки SK3720AT, бела боја, натоварен со метални плочи управуван од Назиф Ајровски од село Дебреште, Прилеп, Македонија.
На албанска територија преку преминот Ќафасан влегол претпладнето на 16ти јуни, а задржувањето по патот го објаснил дека бил приморан бидејќи се загревал моторот. Тој тврди дека немал никакви сознанија за дрогата, стои во досието на кое се повикува агенцијата Балкан веб.
Дрогата е открена со скенер на втората линија на контрола пред возилото да влезе во траектот кој пловел на релација Драч-Анкона, а требало да се растовари во Џенова.
Кокаинот бил во пакетчиња со логоата на Чикаго булс, Пари Сен Жермен, Кензо и Диор.
Продолжува соработката со македонската полиција со цел целосно расветлување на случајот, во кој основано се сомнева дека се вклучени повеќе лица.
