Се зголемува интересот на младите за зачувување на македонскиот фолклор, музика, песна и традиција. Доказ за тоа бил големиот број на млади кои годинава ќе земат учество на 47-мото издание на Фестивалот за народни песни и инструменти „Пеце Атанасовски“ кој на 2 и 3 јули ќе се одржи во Прилеп и Долнени. Комисијата годинава имала тешка задача да одбери околу 330 учесници од околу 600 колку што биле пријавени. Освен за фестивалот кај младите имало и голема желба да учествуваа на семинарот за народни песни и инструменти, кој годинава по 9 пат ќе се одржи во состав на Фестивалот.
„Покрај тоа што се зголемува бројот на учесници, на семинаристи, се зголемува и бројот на учесници на фестивалот. Се повеќе и повеќе имаме и млади учесници кои што ги исполнуваат традиционалните инструменти. Тоа ни беше и целта на самиот фестивал, да го вратиме оној интерес на граѓаните за изучување на традиционални инструменти и песни. Од година во година се зголемува интересот, тоа можеме да го видиме и на самите фестивалски вечери имаме доста млади учесници кои се вљубеници во фолклорот“, М-р Горан Василески, фолклорист – секретар на Фестивалот.
На Фестивалот учество ќе земат групи и поединци буквално од цела Македонија. Првата вечер на плоштадот „Александрија“ во Прилеп ќе настапат 190 учесници, а на втората вечер на Рудина во Долнени ќе настапат останатите учесници.
„ Мерките остануваат се разбира, меѓутоа бидејќи ние сме на отворено сепак и тоа ни е во организациониот дел, дека дел по дел групите каде што се сместени за вечерите и ручеците, потполно ќе ги придржуваме мерките, една група оди, па си заминува, па наредната група и така нема да ги собираме сите на едно исто место преку 300 учесници“, истакна Донка Бачанова, технички секретар и член на Управниот одбор на фестивалот.
И годинава ќе бидат доделени 13 награди на фестивалот како и главната награда „Гајдата на Пеце Атанасовски“.
