Трошоците на живот во јули во однос на јуни се зголемени за 0,5 %, а цените на мало за 2,3 %, објави денеска Државниот завод за статистика. Податоците покажуваат дека за една година, од јули 2020 година до јули годинава трошоците на живот се зголемени за 3,4 %, а цените на мало за 5,4 %.
Пораст во однос на претходниот месец јуни е забележан кај цигарите за 0,9 %, млекото за 0,8 %, лебот и житата за 0,4 % и пивото за 0,3 %. Зголемување има и кај воздухопловниот патнички транспорт за 49,9 %, гасот за домаќинствата за 8,4 %, горивата и мазивата за сопствените превозни средства за 5 %, течните горива за домаќинствата за 4,7 %, туристичките пакет-аранжмани за 3,4 %, услугите за сместување за 2,2 %.
Намалување е забележано кај маслото и маснотиите за 2,2 %, виното за 1,6 %, месото за 0,7 % и сирењето и урдата за 0,3 %. Исто така, намалување на индексите на трошоците на животот има и кај парамедицинските услуги, теписите, облеката, мебелот и покуќнината, кујнскиот прибор, обувките.
