Од МВР апелираат граѓаните да избегнуваат да поставуваат фотографии на социјалните мрежи за тоа каде се наоѓаат, бидејќи со тоа сами се извор на информации за крадците каде може слободно да оперираат. Гостувајќи во Утрински брифинг, портпаролот на МВР, Тони Ангеловски вели дека секоја година за време на празниците апелираат за внимателност.
„Ние како МВР секоја година во ова време и пред летните одмори кога граѓаните ги напуштаат своите домови, апелираме за внимателност, затоа што покрај мерките што ги презема МВР и граѓаните треба да ги преземат мерките од нивна надлежност, за да можат да си ги заштитат домот и имотот. Апелот е доколку луѓето не слават дома, да не се постираат фотографии од местото на настанот кај што се, затоа што на тој начин преку социјалните мрежи им давате сигнал на оние кои имаат криминални намери“, вели Ангеловски.
