Добар дел од докторските дисертации кај нас се подготвуваат преку интернет и тоа за само една година, наместо минимум за 4. Се наведува во нив литература за која ниту авторот нема појма која е таа, а ја нема ниту потребната законитост, за која треба аргументација од која што пак треба да следува заклучокот. Ова е ставот на професор д-р Љупчо Попоски од Прилеп кој цели 11 години беше претседател на друштвото за наука и уметноста од Прилеп, кое деновиве одбележа 50 години постоење.
„На денешната наука и недостасуваат анализата и истражувањето. Анализа на работата и без истражувања не можи. Во секоја област. Без аргументи нема вистина. За ова што се случува е општествена појава за која треба надлежните институции да си го решат тоа. Не може еден вака мал народ да има толку многу ректорати, на ректоратите толку деканати, таа е страшна формација која зема многу пари, ефтино продава докторски, а скапо ќе ја платиме иднината“, вели проф д-р Љупчо Попоски, член на ДНУ Прилеп.
Освен во Прилеп вакво Друштво за наука и уметност има уште само во Битола и МАНУ во Скопје. За жал во другите градови овие Друштва згаснале.
„Треба да имаме повеќе вакви организации, здруженија, друштва. Јас често пати велам дека Друштвото за наука и уметност во Прилеп е светилиште за науката и уметноста. Место каде што треба да се собира академската заедница. И ние тоа успеваме да го оствариме. Овие години ги споивме стручните, научните работници со уметниците да му дадеме значење на тој дел. Една држава и силна доколку е силно образованието и науката“, додаде д-р Силвана Пашоска, претседател на ДНУ Прилеп.
Ова Друштво опстојува благодарение на ентузијазмот на членовите и поддршката на локалната самоуправа сите воие години. По повод 5 децениското постоење за прв пат се изваде Меморијална книга како и Јубилејно списание на трудови.
„Во Јубилејното издание се презентирани 23 труда од преку 30 автори од различни области. Кои што се доволен доказ дека тука во Прилеп во ова Друштво е всушност расадникот за изворни научни трудови кои што располагаат со сопствени истражувања. Јас сум искрено горда на сите овие публикации, особено на јубилејното издание затоа што во него има трудови кои што со својата содржина ќе мотивираат и наредни истражувања“, истакна проф. д-р Јованка Тутеска, член на ДНУ Прилеп.
Друштвото брои 170 членови, придружни, почесни, редовни и нови членови, што е од особена важност затоа што е доказ дека друштвото се зголемува. Само годинава има 14 нови членови.
