По повод неделата на демократијата ООУ „Кочо Рацин“ во соработка со ООУ „Кирил и Методиј“ од селото Канатларци организираше серија на настани чија цел е основниците да научат да си помагаат помеѓу себе, да се почитуваат и како да имаат толеранција на различностите. Активностите се одвиваа во училишниот двор на „Кочо Рацин“, каде дел од децата учествуваа во спортски активности, а дел пак ги цртаа белите ѕидови од дворот. Други ученици пишуваа пораки на тема демократија на турски и македонски јазик.
„Денеска децата треба да си подадат рака, и не само денеска туку и во другите денови, да си помагаат, да се почитуваат, да се сакаат и да знаат на кој начин треба да се помируваат. Тука се вклучени децата од 4 и 8 одделение и ликовната секција“, истакна Јулијана Тренкоска, директорка на ООУ „Кочо Рацин“ – Прилеп.
По повод неделата на демократијата се организирале и други разни работилници и дсебати и она што пред неколку години започнало како проект сега веќе станало традиционално.
„Оваа година акцент ставивме на врсничкото насилство, тема која што е голем проблем за нас и со која секојдневно се соочуваме. Работилниците кои што ќе се одржуваат се прилагодени според возраста на учениците. Во секое одделение се спроведуваат различни работилници, а учениците кои се одговорни и кои ги спроведуваат нив се претседателите и замениците во одделенијата, односно членовите на ученичката заедница. И како еден вид на завршна активност која што ќе ја спроведат најстарите, учениците од 8 и 9 одделение од нашето училиште е дебатата и овие дебатери ќе дебатираат на тема дали сајбер и булинг насилниците иако ги носат овие негативни епитети сепак имаат повеќе пријатели и се поомилени во друштвото“, додаде Вера Цветкоска, наставник по германски јазик.
За жал насилството кај врсниците и учениците се уште е застапено и ваквите настани помагаат младите да истото да го искоренат, односно пред се да се превенира, да се рабуди свеста кај младите дека тоа не е добро и да се спречат ваквите немили настани.
