Годинава веќе се вработија дел учениците од првата генерација на дуални паралелки во Прилеп од СОУ Ристе Ристески Ричко. Дуалното образование имаше два профили, техничар за индустриска мехатроника и техничар за производно машинство, според германскиот модел на ваков вид на образование. Овој систем се смета како еден од излезите за дефицитот на стручна работа рака. Охрабрени од ова и македонските компании годинава побарале дуални паралелки за машински техничар и машинско енергетски техничар.
„Карактеристично за овие 2 профили е што имаат и меѓуиспит кој се остварува со помош на германската амбасада. Во трета година се врши првиот испит каде што учениците полагаат и со тој сертификат подоцна можат да конкурираат на европскиот пазар, бидејќи сертификатот е меѓународно признат“, истакна Цветанка Ѓорѓиеска, директорка на СОУ „Ристе Ристески Ричко“ – Прилеп.
Дел од компаниите бараат државата да воведе и дуални паралелки и за другите професии за кои што има потреба на пазарот на труд.
„Стопанството бара машинобравари, заварувачи, но во нашето училиште сега имаме само автоелектроничари, електроничари, автомеханичари, но за жал машинобравари и заварувачи немаме. Да се надеваме дека Министерството за образование и наука ќе има слух да ни ги одобри тие паралелки“, додаде Ѓорѓиеска.
В година ќе заврши и првата генерација од СОУ „Ѓорче Петров“, каде има дуални паралелки во рударско геолошката и текстилно кожарската струка. Она што тука е остава впечаток е дека рударската струка иако доста добро платена, се работи само со машини, Прилеп Општина со најголем број на рудници, не е атрактивна многу за младите.
„Со овој начин на учење корист имаат и учениците и компаниите. Учениците практично и директно на работни места се усовршуваат, додека работодавачите добиваат обучен кадар кој е подготвен веднаш по завршувањето на образованието да излези на пазарот на трудот и успешно да ги врши своите работи“, кажа Жанета Видеска, в.д. директор на СОУ „Ѓорче Петров“ – Прилеп.
Според стопанската комора и експертите без взаемна соработка на бизнисот и образованието потребата од работна рака во државава само ќе се зголемува, а со тоа и иселувањето на младите.
