НОВО во GALA WASH Прилеп !!! Перење на патосници - Антибактериски мирис - Црнило за гуми
Нашата екипа ова утро се наоѓа во гимназијата „Мирче Ацев“ во Прилеп, а повод за денешниот разговор е еден навистина интересен настан, а тоа е за прв пат во Македонија се организира натпреварот „Средношколец милионер“. Токму овие дечки околу мене се една од екипите која влезе во топ 20 во Македонија со својата бизнис идеја. Идејата се вика AI Stock Brocker, а што повеќе содржи таа ќе ни раскажат моите соговорници од десната страна Софија Иваноска и Марин Христоски. Секако тука е и директорката Снежана Спиркоска која што ќе ја оставиме за крај на ова интервју, а тука се и другите членови на екипата кои го сочинува овој тим: Леона Фукароска, Давид Гулески, Никола Здравески и Глигор Иваноски кој што во моментов е на Олимпијада по природни науки во Сочи, Русија.
Морам прво да кажам, јас сум убеден дека првиот милионер ќе биде во Прилеп. Како што знаат гледачите, онаа екипа која ќе победи добива милион денари. Сега прво да си ветиме тука пред камера, да не биде после не сме кажале, добро честење, а потоа парите употребете ги за проектот.
Разговорот го почнуваме со Софија, како се роди оваа идеја, една интересна идеја каде се употребува вештачката интелигенција како помош за идните инвеститори на кој начин и каде да ги инвестираат своите средства.
Иваноска: Поради добрата промоција на натпреварот ние дознавме за него и сакавме да учествуваме, но не заради парите, туку да претставиме дека младите всушност можат да направат најразлични логички решенија за најразлични проблеми. Сакаме од овој натпревар да собериме најразлично искуство за претприемништвото и да ја претставиме нашата идеја, која мислиме дека е доволно добра да им помогне на луѓето кои се во нашата средина. Исто така мислиме дека со ова излегуваме од нашата комфор зона и сакаме оваа идеја да ја развиеме во вистински услови и се надеваме дека Брејнстер ќе ни го овозможи тоа.
Дали сте разговарале со некои информатичари и економисти за развој на оваа идеја досега?
Иваноска: Досега сето ова што го имаме направено е заслуга на овој тим и се надеваме дека сега пред инвеститорите, во следната рунда во сабота и недела, дека ќе поминеме во топ 10 и ќе добиеме најразлични критики. Исто така морам да спомнам дека од вчера до четврток имаме менторски сесии кои ни вршат предавање за најразлични информации кои ни се потребни за презентацијата во сабота и недела.
Значи во сабота и недела од овие топ 20 бизнис идеи ќе се одбере победникот, а претходно беа 50 екипи. Од Прилеп имаше уште една екипа од средното училиште „Ристе Ристески – Ричко“, која за жал не влезе, но ги имаме прилепчаните за кои сме убедени дека ќе бидат средношколци милионери.
Тука со нас е и Марин Христоски, кажете ни како во сабота и недела ќе ја претставувате својата идеја?
Христоски: Па за во сабота и недела треба да подготвиме 90 секунден пич со кој ќе ја опишеме нашата идеја најдобро што можеме за тоа време. Во четвртата рунда ќе треба да подготвиме презентација долга 3 минути со која ќе треба да им го одземеме вниманието на инвеститорите и да ги добиеме нивните гласови.
Ја прашав и Софија, како ги споивте вештачката интелигенција со бизнисот, парите, економијата?
Христоски: Нашата идеја претставува дигитална платформа што анализира берзи, крипто валути и пазар на недвижнини, што значи ова ќе биде само алатка за инвеститорите, а не целосна замена на нивната работа.
Значи некакво советодавно тело кое би го советувало бизнисменот кој има пари, а не знае каде да ги вложи и вештачката интелигенција би му помогнала во тој процес.
Христоски: Да, тоа би помогнало во многу држави, како нашата каде финансиската едукација е прилично ниска.
Интересно е да се потенцира дека од овие 20 екипи кои влеговте, вашиот проект беше втор.
Христоски: Да, беше втор по бројот на гласови, имавме 1.500 гласа кои беа доволно за второ место на државно ниво.
Имаше и други идеи од овој карактер?
Христоски: Имаше слични, но најмногу беа за финансиска едукација, а нашето е повеќе за совети и напредување.
Еве за крај, ќе поразговараме со директорката. Колку сте горди со учениците од овој тим за постигнатиот успех?
Спиркоска: Ова е доказ дека нашите ученици од нашата гимназија се многу талентирани, учествуваат на голем број на натпревари во нашата земја, но и на меѓународни олимпијади. Многу сме горди на нивните досегашни успеси и со ова покажаа дека тие можат уште сега да креираат разни бизнис идеи со кои ќе помогнат за личен интерес на заедницата. За да стасаат до 20-те одбрани на натпреварот за бизнис идеја „Средношколец милионер“ им требаше да соберат и доволен број на гласови. Тие ги собраа доволните гласови за да бидат на второ место во Македонија.
Сега селекцијата е подруга, не се гласа туку се претставува идејата пред комисија.
Спиркоска: Да, сега во сабота и недела ќе ја претстават идејата пред комисија и се надевам дека ќе излезат први на тој натпревар „Средношколец милионер“.
Како ќе ги стимулирате овие дечки ако го освојат милионот?
Спиркоска: Сигурно ќе бидат наградени за сето тоа, за целокупниот нивни труд, како од заедницата, така и од нашето училиште.
Ви благодарам за разговорот, уште еднаш честитки од нашата екипа, се надеваме дека в сабота и в недела ќе добиеме убави вести од вас и дека в понеделник повторно тука ќе снимаме уште еден прилог, но во малку подруга варујанта.
Драги гледачи, тоа беше прилепскиот тим од гимназијата „Мирче Ацев“ кој учествува со својата бизнис идеја на натпреварот „Средношколец милионер“.
