Денес членовите на Ловното здружение „Мукос“ од Прилеп реализираа еколошка акција во ловиштата во Мариовскиот регион, каде беа засадени садници од бадем. Со оваа активност ловците уште еднаш покажаа дека нивната улога не е само во грижата за дивечот, туку и во зачувувањето и збогатувањето на природата. Бадемот е растение кое добро се прилагодува на природните услови во Мариово и во иднина ќе претставува дополнителен извор на храна за дивечот, придонесувајќи за подобра природна рамнотежа во ловиштата.
„Особено сме горди што ваквата активност ја реализираме во година кога одбележуваме 80 години од постоењето на Ловното здружение „Мукос“, продолжувајќи ја традицијата на одговорно ловство и грижа за природата. Овој јубилеј го одбележуваме не со зборови, туку со дела. Делата што ќе останат, ќе растат и ќе сведочат за нашата посветеност. Мариовскиот крај, познат по својата недопрена природа и автентичност, заслужува вакви иницијативи. Со оваа акција придонесуваме за подобрување на биодиверзитетот, создавање услови за дивечот и разубавување на овој прекрасен регион. Како ловци, ние не сме само корисници на природата – ние сме нејзини чувари. Нашата мисија е да ја зачуваме, унапредиме и да ја предадеме во уште подобра состојба на идните поколенија. Ловците од „Мукос“ и понатаму ќе продолжат со активности кои придонесуваат за зачувување и унапредување на природната средина, со цел да оставиме здрава и богата природа за идните генерации“, информираат од Ловното здружение „Мукос“ од Прилеп.
