Уставните измени се само дел од она што треба да го исполни Македонија за да стане членка на ЕУ, тука се и двата Протокола и Договорот за добрососедство кои исто така треба да се исполнат, истакна денес бугарската вицепремиерка и министерка за надворешни работи Марија Габриел.
„Бугарија нема билатерален проблем со Република Северна Македонија. Бугарија, во име на заедничкиот европски интерес, и кажува на Северна Македонија што значи да се биде членка на Европската Унија. Имаме три меѓусебно поврзани инструменти и многу јасен став на Националното собрание. Условите кон нашата соседна земја не се само уставни измени, туку и почитување на Договорот за пријателство и добрососедство и двата Протоколи“, рече Габриел на состанок на собраниската Комисија за надворешна политика, прашана за европскиот пат на Северна Македонија.
Таа исто така посочи дека иако се направени две технички средби во Софија и Скопје сепак нема напредок по темите кои треба да се решат и дека нивните позиции се многу јасни, а тоа го знаат сите во Европската Унија. Според неа тоа е обврска која ние како држава сме ја презеле и која треба да исполниме.
