20 години се зборува за патот Прилеп-Градско и 20 години немало ваков прогрес на изградбата каков што има денеска. Најголемиот прогрес и најголемите градежни работи се реализирани токму денеска и во последните две години, истакна министерот за транспорт и врски Благој Бочварски, на денешниот увид во градежните работи на експресниот пат Прилеп-Градско, кај делницата Градско-Дреново.
„Токму поради тоа можам да го изразам само задоволството од реализацијата на овој проект и токму поради тоа што за само 2 години имаме преку 40% прогрес на овој пат, за да денеска дојдеме на 75% и нашите очекувања се дека со ваква динамика, вакво темпо ќе го завршиме на почетокот или најдоцна средина на 2024 година. Со што ќе биде пуштен во употреба. Ова е децениска желба и барање на бизнис коморите на Прилеп, Битола, Пелагонискиот регион, Велес, Росоман и сите останати градови“, истакна Бочварски.
