Владата воведе целосна забрана за движење во шумските подрачја низ државата, која стапи на сила денеска. Како што соопшти Владата, ова е во интерес на личната безбедност на граѓаните, но и за да се спречат нови пожари.
Ваквиот владин чекор следи откако во текот на вчерашниот ден територијата на нашава земја беше зафатена со неколку пожари, од кои најтешки за локализирање беа во Кочани и Старо Нагоричане, кумановско.
Центарот за управување со кризи (ЦУК) синоќа соопшти дека активни пожари на повеќе локации имало во Струмичкиот, Кумановскиот, Охридскиот, Битолскиот и во Штипскиот Регион, признавајќи дека некои од нив се надвор од контрола. Во гаснењето на некои пожари се вклучи и војската.
