Компанијата „Еколог“ од Тетово донира 10 амбулантски возила со опрема за здравствените установи низ земјава, и тоа, во Куманово, Гостивар, Кичево, Дебар, Струга, Битола, Велес и Штип и 2 во Тетово.
Во име на Министерството за здравство, донацијата ја прими државниот секретар во Министерството за здравство Иванка Стојановски.
„Донацијата ќе биде од огромна корист за здравствените установи и медицинскиот персонал и директно ќе помогне во спасување на највредното – човечкиот живот и однапред Ви благодарам за секоја навремена интервенција и спасен живот “, рече Стојановски.
Од компанијата посочија дека нивната општествена одговорност ја вклучува посветеноста кон одржлив економски, еколошки и социјален развој.
„Ние се обидуваме да ги идентификуваме потребите на општеството и се обидуваме да го поддржиме неговиот напредок кон повисоки цели и благосостојба. „Еколог“ одлучи денес да донира 10 амбулантни возила со опрема за здравствените домови во Македонија“, соопштија од компанијата.
