Британскиот принц Филип почина на 99-годишна возраст, пренесува Би-Би-Си. Веста за смртта ја потврди и Бакингемската палата.
„Со длабока тага, кралицата ја објави смртта на својот сакан сопруг, принцот Филип, војводата од Единбург“, се вели во соопштението на кралицата.
View this post on Instagram
Принцот Филип и кралицата Елизабета се во брак 73 години, што го прави сопруг на владејачкиот монарх со најдолг мандат од 69 години.
Принцот е роден на 10 јуни 1921 година, а потекнува од грчко и данско кралско семејство. По школувањето во Франција, Германија и Велика Британија, тој се приклучил на британската кралска морнарица во 1939 година кога имал 18 години.
Со тогашната принцеза, а сега Кралица Елизабета се запознале во 1934 година, а по Втората светска војна, Филип добил дозвола од кралот Џорџ Шести да ја запроси Елизабета.
Пред свршувачката јавно да биде објавена во 1947 година, Филип се откажал од грчките и данските кралски титули и станал полноправен Британец, земајќи го презимето на предците на неговата мајка, Маунтбатен.
Филип и принцезата Елизабета се венчале на 20 ноември 1947 година, по што тој доби британски кралски титули.
