Бурекот е специјалитет кој горе-долу сите го имаат пробано, топол бурек и чашка јогурт е секојдневен појадок на многумина.
Во последните неколку години сме сведоци на многу варијации на тема, па овој деликатес можете да го пронајдете и во солени и во слатки варијанти, со што и да замислите.
Досетливите пекари успеале да ја „заскокоткаат“ имагинацијата и на менито да понудат сè и сешто. Со тоа, покрај класичниот бурек со сирење и месо, денес имаме и пица бурек, бурек со компири, бурек со зелка, но и со разни слатки филови како лешник или ванила крем.
Но една пекара во Бор, Србија отиде најдалеку во иновацијата на бурекот па на своите муштерии им нуди бурек со плескавица. Овој специјалитет се нарекува хамбурек, нешто слично како познатиот хамбургер, но наместо во лепче плескавицата е во корите од бурекот.
„Хамбурекот“ предизвика бројни реакции, па многумина ја поздравија ваквата идеја и сакаат што поскоро да го пробаат додека други сметаат дека ова е сквернавење.
