Министерката за труд и социјална политика Јагода Шахпаска апелираше пратениците што поскоро да го донесат законското решение за недела да биде неработен ден, што би требало да почне да се применува од 1 октомври.
„Апелирам до пратениците, затоа што работниците се нашиот најголем човечки капитал да се погрижиме да им овозможиме да се воспостави баланс меѓу приватниот и професионалниот живот“, рече министерката Шахпаска.
Измените предвидуваат дека во оние дејности каде што работниот процес е од таква природа што не може да се прави прекин поради техничко-технолошкиот процес, ден за одмор ќе биде друг ден во неделата. Исто така, на работниците кои работеле во недела ќе треба да им се даде и додаток на плата од најмалку 50 проценти за секој час поминат на работа во недела, во случај кога законот или колективниот договор не предвидуваат повисок додаток.
