Наскоро излегува од печат книгата „150 години Тут-Ком Прилеп 1873-2023“ од д-р Љубен Попоски – уникатно дело што ја открива историјата и значењето на тутунот во Македонија, особено во Прилеп, но и го одбележува богатото културно и стопанско наследство на градот.
Делото претставува документарен приказ на историјата и значењето на тутунот и тутунската индустрија, која со децении има клучна улога во развојот на националната економија и е двигател на економскиот и општествениот живот во Прилеп.
Тутунската индустрија мобилизира милионска работна сила, започнувајќи од примарното производство, преку обработката и производството на цигари, па се до прометот на тутунски производи и придружната индустрија. Со тоа таа создава синџир на вработувања и воедно ја ангажира науката за истражување на сите аспекти поврзани со оваа култура.
И покрај глобалната антипушачка пропаганда, тутунот и денес задржува особено место во стопанствата на многу држави. Во своето истражување д-р Попоски успева да ја прикаже сложената приказна за Прилеп како центар на оваа индустрија и да ја претстави книгата како капитално дело за историјата и иднината на македонскиот тутун.
Во моментов се собираат донации и средства за нејзино печатење, од Друштвото за наука и уметност во Прилеп како издавач, се надеваат дека на ова ќе се приклучат што е можно повеќе компании од градот, за да може книгата побрзо да го види светлото на денот.
