Речиси три четвртини од луѓето кои по 2001 година во САД се осудени за кривични дела поврзани со тероризам, се родени во странство, соопшти американското Министерство за внатрешна безбедност.
Федералното министерство објави извештај. кој доаѓа во време кога Администрацијата на претседателот Доналд Трамп се обидува да ги прекине програмите кои дозволуваат да се примат мигранти, без да се процени дали ќе бидат од корист за САД.
По нападите на 11 септември 2001 година, 549 лица биле прогласени за виновни од федералните судови во САД под обвинение за тероризам. Од нив 402, односно 73 отсто, се родени во друга земја, при што 148 се натурализирани Американци, а 254 со друго државјанство. Останатите 147 осудени се американски државјани по раѓање.
Во овој период од над 16 години, 1.716 странци се протерани од САД поради тоа што претставувале закана за националната безбедност, стои во извештајот кој бил изготвен по налог на Трамп.
