Утре ќе се одржи координативен состанок на кој ќе се разгледува иницијалната рамка за решавање на разликата околу името меѓу Македонија и Грција, што ја предложи медијаторот на Обединетите нации Метју Нимиц на 17 јануари во Њујорк.
Состанокот се одржува на иницијатива на Министерството за надворешни работи во Клубот на пратеници во18 часот.
Што сè содржи рамката официјално никој не потврди, но ако се земе предвид што објавуваа медиумите, утре премиерот Зоран Заев, министерот за надворешни работи Никола Димитров, шефот на државата Ѓорге Иванов, претседателот на ВМРО-ДПМНЕ Христијан Мицкоски и лидерот на ДУИ Али Ахмети ќе разговараат за предлогот во кој има пет евентуални решенија за името проследени со предлози како да се нарекуваат и јазикот и националноста. Република Нова/Северна/Горна/Вардарска Македонија или Република Македонија (Скопје) се наводните предлози од медијаторот.
В понеделник и вторник Нимиц ќе биде во Атина, а в среда и четврток во Скопје. Тој ги очекува одговорите на раководставта на Македонија и Грција на неговиот пакет предлози.
