Здружение Достоинствен Работник во рамките на проектот: „Унапредување и одржување на правични и продуктивни работни средини за развој на локалната заедница“ поддржан од швајцарската програма Цивика Мобилитас, организираше тркалезна маса со присуство на професори/ментори од кариерните центри од средните училишта од Прилеп и претставници од граѓанскиот сектор за предизвиците и перспективите на социјалните претпријатија во земјата и регионот.
Воедно, социјалното претприемништво во Северна Македонија е во своите првични стадиуми на развој, но постоечките социјални претпријатија покажуваат дека има потенцијал за раст и развој на овој концепт и кај нас. За разлика од Европа, каде социјалната економија придонесува за околу 10% од БДП, а секое четврто новоотворено претпријатие е социјално, ние сме одвај на почетокот соочувајќи се со бројни предизвици.
„Социјалните претпријатија се карактеризираат со тоа што, иако користат претприемачки принципи, се стремат да и служат на заедницата. За разлика од другите бизниси, профитот кај овие претпријатија се реинвестира за постигнување на конкретна општествена промена. Нудат иновативни приоди за одржлив и рамномерен развој, обезбедуваат добра и услуги за маргинализираните и неразвиени заедници и вработуваат лица од ранливи групи“, истакна Стефан Чичевалиев, Извршен директор на Опсерваторија за социјално претриемништво од Скопје.
За да се поттикне развојот на овој концепт на претпријатија, потребна е заокружена законска рамка на национални политики која треба да овозможи:
- – дефинирање на социјалното претприемништво и социјалните претпријатија во македонскиот контекст;
- – отстранување на сите законски пречки за делување преку креирање на флексибилни механизми, можност за социјални иновации како и фискални и даночни бенефиции и;
- – добро осмислени, балансирани и сеопфатни стратегии и програми за поттикнување и развој на социјалните претпријатија имајќи ги предвид споменатите предизвици и потреби.
„Развојот на социјално претпријатие, како и започнувањето со кој било нов бизнис, е возбудлив и активен процес што бара многу посветеност и време. Тоа бара многу напорна работа, но подеднакво треба да биде корисно и пријатно искуство. Здружението Достоинствен Работник од овој аспект во наредниот период ќе ги едуцира и зајакни професорите/ментори на кариерните центри во средните училишта да го видат предизвикот и да ги вклучат учениците за нивно професионализирање при вклучување на пазарот на труд“, вели Рубинчо Аризанкоски, проект координатор.
Заклучокот е дека развојот на социјалното претприемништво во Северна Македонија е неопходно да биде стратешки поддржан и да се интегрира во плановите за економски и одржлив развој. Во поддршката на социјалната економија потребно е да се вклучи пошироката бизнис заедница паралелно со јавните институции и агенции како и граѓанскиот сектор.
Автор : Рубинчо Аризанкоски
