Македонија, Словачка и Чешка заеднички ќе чествуваат манифестацијата „По трагите на светите Кирил и Методиј“. Овој настан годинава е вклучен во Европската програма за регионален развој и ќе се реализира со учество на Република Чешка, Република Македонија и традиционалниот домаќин – Република Словачка.
Премиерот Зоран Заев денеска го прими амбасадорот на Словачка, Хенрик Маркуш, кој на средбата го претстави долгогодишниот организатор и иницијатор на манифестацијата „По трагите на светите Кирил и Методиј“, Стојан Лекоски, наш сонародник кој повеќе децении живее во Словачка.
„Да покажеме заедно со Словачка и Чешка дека делото на сесловенските просветители, светите браќа Кирил и Методиј е од заедничка вредност за паметење и чествување на сите словенски народи и од огромно значење за европската духовна и културна историја“, истакна премиерот Заев на средбата.
Заев на средбата предложи оваа година настаните во рамките на манифестацијата „По трагите на светите Кирил и Методиј“ што ќе се организираат во Македонија, да бидат вклучени во програмата за одбележување на 30 – годишнината од прогласувањето на независноста на нашата земја.
На средбата со амбасадорот Маркуш се разговарало и за взаемната соработка меѓу Словачка и Македонија во процесот на европските интеграции на нашата земја, како и за економската соработка за која има потенцијали за дополнителен развој.
