Попладнево Општина Долнени беше погодена од катастрофално невреме. Иако беа погодени повеќе села, сепак најголеми штети од сите населени места има во селото Лажани, каде се излеа Саждевска река и се поплавија 50-тина куќи по течението на реката од нејзината лева и десна страна. Водата во овој момент започна да се повлекува, но тука во селото Лажани ситуацијата е се уште навистина критична, на терен се излезени екипи на ТППЕ Прилеп, Центарот за управување со кризи и Дирекцијата за заштита и спасување кои со моторни пумпи, заедно со жителите од Лажани се обидуваат да ја извлечат водата од поплавените домови. Со багери пак се расчистуваат големите наноси на кал и се она што со себе го носеше водата.
На терен е и градоначалникот Урим Ибески од Општина Долнени, тој ни рече дека до оваа ситуација дошло поради тоа што несовесни граѓани постојано фрлале шут и ѓубре во реката, а имало и узурпација на околниот простор со скелиња и други предмети и објекти, со што бил оневозможен нормален проток на водата. Но сепак и Ибески признава и потврдува дека станува збор за огромни количини на дожд, кој врнел околу 3 часа, но дополнителни количини на вода надошле и од околните планини. Така што речното корито немало капацитет да ја собери целата вода која во тој момент поминувала низ Лажани.
Некаде се поплавени подрумите на куќите, а некаде и првиот спрат. Жителите кои претрпеа најголема штета се евакурирани од домовите и ноќта ќе ја поминат кај свои роднини и пријатели. Тие од домовите беа спасувани и извлекувани со помош на трактори од нивните сожители. До овој момент нема пријавено за повредени лица или жртви.
Моментално во поголем дел од општината превентивно е исклучена струјата за заштита на жителите. Екипи од ЕВН се на терен и ја следат ситуацијата. Освен кај домовите утре ќе има појасна слика колкава е штетата и кај земјоделските култури. Од Општина Долнени велат дека и понатаму остануваат на терен со жителите.
Допрва треба да се процени штетата, а најверојатно утре освен што ќе се формираат комисии за проценка на штета, ќе се бара поголема помош и поддршка од централната власт. Утре ќе се има една појасна слика за тоа колкави се штетите и како точно се случила оваа поплава.
