Спомен куќата на Блаже Конески за прв пат се поставува на туристичката мапа и понуда на земјава. Освен странски туристи, планирано е тука конечно да започнат и организирани училишни екскурзии. Денеска се потпиша Декларација за развој на локалниот туризам во Општините Прилеп и Долнени која иницијатива ќе биде доставена до повеќе фактори, ЗЕЛС, неколку министерства и Владата. Од поранешната Фондација „Небрегово“ сега Културно едукативниот центар „Небрегово“ велат дека овој настан се организира во очи на големиот национален празник 8 Септември, со гласна порака да се стави до знаење колкава е големината на великанот Конески.
„Затоа што Блаже Конески се вградил и како човек, а особено со неговото епохално дело во националните обележја, во нашиот културен идентитет, во нашиот национален идентитет и во нашата опстојба. Токму тоа е основната причина Спомен домот Блаже Конески да се најде на туристичката мапа на Македонија“, истакна Атанас Конески, секретар на Управниот одбор на Културно едукативниот центар „Небрегово“.
Од Заводот и музеј Прилеп истакнаа дека со оваа иницијатива се очекува дратсично зголемување на бројот на туристи во Спомен домот на Блаже Конески и негова уште поголема афирмација.
„Доаѓаат групи на ученици, на студенти, од институции, македонистите најмногу, учениците дури тука имаат и свои рецитали, програми, се случуваат проекти. Ние како Завод и музед секогаш проектите со учениците намерно тука ги реализираме со цел да не се заборави и да остане засекогаш во незаборав името Блаже Конески“, додаде Лилјана Неделкоска, библиотекар во Завод и музеј Прилеп и задолжена за Спомен домот.
„Денеска се потпишува Декларацијата со која што официјално целата програма за Спомен куќата со цената на чинење, заедно со локланите информации во смисла на пред и по посетата на Небрегово ќе биде ставена во Програма“, изјави Мимоза Конески, туристичка агенција.
Од оваа иницијатива бенефит би имал целиот регион затоа што во план е туристите кога ќе ја посетат Спомен Куќата на Конески, истиот ден да бидат однесени и до Куќата на Пеце Атанасовски во Долнени, да се посетата Манастирите Трескавец и Зрзе, како и другите поставки на Заводот и музеј Прилеп.
