Две лица загинаа вечерва во пожар кој што се случил на улицата „Цане Илиески“ во Прилеп. Според командирот на ТППЕ Прилеп, Христијан Момироски, пожарот бил пријавен во 21.45 минути, а тие веднаш интервенирале со 3 возила и 9 пожарникари.
„Според првичните информации едно лице е изгорено, а другото лице се загушило од чадот. Станува збор за две машки лица на возраст некаде околу 60 и 80 години. Но ова се сѐ уште првични и неофицијални информации. Официјални информации се очекуваат утре. Пожарот е веднаш изгаснат од наша страна, но за жал лицата пред да стигнеме веќе биле починати. На лице место излезена е и увидна екипа на МВР, Јавен обвинител и сите истражни органи за да се откријат причините за настанатиот пожар“, вели за Инфо Компас, Христијан Момироски, командир на ТППЕ Прилеп.
Повеќе информации за оваа трагедија се очекуваат утре.
