„Од 0 до КултурА“ продолжува со нова музичка вечер. На сцената на Камена бина вечерва ќе настапи прилепскиот панк-рок и поп-панк бенд Side Quest, кој од 2023 година е дел од македонската алтернативна музичка сцена.
Публиката ќе има можност да ужива во музичко патување низ историјата на панк-рокот – од бендовите кои го поставија темелот на овој музички правец, па сè до современите влијанија што го обликуваат денес.
Side Quest моментално го подготвува својот прв деби албум, а зад себе веќе има објавено авторски сингл, песна посветена на ФК „Победа“ и современа преработка на македонската народна песна „Ако одам во Битола“. Бендот има настапувано како предгрупа на повеќе познати домашни состави, а беше и финалист на фестивалот за млади бендови „Лузер Фест“.
Ве покануваме да бидете дел од уште една вечер исполнета со квалитетна музика и одлична атмосфера во рамките на проектот „Од 0 до КултурА“.
