Државата по разни основи до овој момент ни должи над 100 милиони евра субвенции и бараме нивна итна исплата. Со овие обвинувања денеска излегоа земјделците кои од различни гранки се собраа во Прилеп.
„До 31.12.2024 година Министерството должи 2.4 милијарди денари, или 39 милиони евра. Сега сме на прагот да се дадат субвенции за тутунот 33 милиони евра. 100 хектари по 200 евра се 20 милиони, плус каде е тука градинарството, сточарството, овчарство, пчеларство, додатните мерки за однесени производи во преработувачките капацитети? Значи над 100 милиони евра. Без субвенции не може, а субвенциите зборуваат дека не биле рентабилни. Субвенциите се рентабилни, но тие кои се навремени, ако не се навремени тогаш не се рентабилни. Пример во есен парите од пиперките ги трошам за да посеам пченица, бидејќи во летото по 10 денари сум ја продал пченицата, нема проста репродукција да се направи. Значи од еден артикал ги трошиш парите за друг, субвенции нема дадено, а ако има субвенции ќе купиш и семе и ѓубриво и се што треба“, истакна Миле Кебакоски, здружение Фармери југо-запад.
Земјоделците исто така бараат Програмата за субвенции во 2026 да важи таа од 2025 година, а дури в година да се менува во договор со земјоделците.
„Не се согласуваме и во друг дел, во делот за условено субвенционирање, бидејќи таму има критериуми кои многу од земјоделците, особено помалите нема да можат да ги задоволат. Министерот излезе со некоја изјава дека ќе има некаков транзиционен период од 2 до 3 години, но за жал досега немаме одлука на влада“, вели Ѓорѓи Каракашев, Национална земјоделска мрежа.
Најголеми проблеми во моментов имаат сточарите на кои се доцнат исплати по разни основи. Велат дека без субвенции нашето земјоделството не би опстанало бидејќи има увоз на поевтини земјоделски производи кои се субвенционирани во нивните држави таму, а влегуваат на нашиот пазар.
„За рок од еден месец да ни ги исплатат грлата целокупно во државата, потоа бараме за 3-4 дена да ни исплатат 7 месеци од субвенциите и дадените 3 се собираат 10 месеци, а двата месеци ќе си влезат во наредната година. Значи сега не бараме исплата од 3 месеци, туку од 7 месеци, плус за месец дена да ни се исплати комплетно за грло, тоа е првиот проблем. Вториот проблем, да ни ја вратат старата програма на 12 илјади денари експресно сега, со некои измени каде телињата ќе влезат во приплод платени по 12.000 денари од грло, бидејќи гледаме во Србија, каде 500 евра е по крава, а кај нас 8.000 денари. Значи нашиот сточар треба да ја зема 3 години субвенцијата, што сточарот со исти грла ќе ја земи во една година. Таму е 9 денари млекото, кај нас е 6 денари млекото, увезуваат од таму и овде кај нас паѓа млекото. Државата треба да стави тука некој граница, да не заштити. Се намалу сточниот фонд, јас доаѓам од село Могила каде од 500 куќи каде имаше крави, сега дали има 13, од кои 4 се поголеми фарми“, кажа Борче Бучински, здружение „Пелагониско поле“.
„Претежно за нас земјоделците и сточарите ни е потребна и моментална помош од владата за оваа пролетна сеидба од субвенционирана зелена нафта, да ни помогнат и да се стабилизира цената да не оди преку ноќ 100 денари, затоа што ако сега почнеме да работиме со скапа нафта и скапи горива, а цените нагло паѓаат, тогаш нашето производство ќе биде во опасност“, додаде Тони Петкоски, здружение „Пелагониско поле“.
Сите заклучоци од денешната средба во писмена форма ќе бидат доставени до Министерството за земјоделство.
