По реакциите на јавноста поради пишувањето на коси црти (/////) на графите во полето државјанство во официјалните документи, од Управата за водење на матични книги известија дека од денес во графите за државјанство ќе пишува „македонско/граѓанин на Република Северна Македонија“.
Од Управата посочуваат дека тоа било така бидејќи морало да се спроведе соодветна процедура во електронскиот систем за издавање на изводи од родени, венчани и умрени.
„Согласно член 2 став 3 од Уставниот закон за спроведување на амандманите од XXXIII до XXXVI на Уставот на Република Северна Македонија, во графата државјанство во изводите од родени, венчани и умрени, издадени пред и по стапувањето во сила на Конечната спогодба помеѓу Република Северна Македонија и Република Грција, треба да биде впишано македонско/граѓанин на Република Северна Македонија“, велат од Управата за водење на матични книги.
Инаку, државјанството беше предмет на Преспанскиот договор со Грција.
„Државјанството на Втората страна ќе биде македонско/граѓанин на Република Северна Македонија, како што ќе биде заведено во сите патни документи“, пишува во членот 1, став 3 од Преспанскиот договор.
