Во гостување на дневникот на Сител, министерот за здравство Венко Филипче потврди дека има зголемување на бројот на новозаразени, како и зголемување на бројот на пациенти на кои им е потребна хоспитализација, па затоа и модуларните болници веќе се поставени. Исто така, по најавата на премиерот Зоран Заев дека во понеделник ќе заседава главниот кризен штаб, Филипче кажува дека викендов ќе се анализира состојбата за коронавирусот, а во понеделник ќе се одлучи дали има потреба од нови рестриктивни мерки.
„Дали овој тренд на зголемување ќе продолжи или ќе заземе некое плато, односно дали ќе биде слична слика како во ноември. Засега не е. Тогаш исполнувањето на болничките капацитети беше многу побрзо, отколку сега. Но, внимателни сме и затоа модуларната болница кај Инфективната клиника повторно е во функција, болницата Козле е исто така подготвена и ќе ја пратиме ситуацијата следните денови. Заклучно со почеток на следната недела ќе одлучуваме дали се потребни некакви дополнителни рестриктивни мерки или не“, вели Филипче.
