Долгометражниот игран филм „Бизнисот на задоволството“ на режисерот Гоце Цветановски од четврток, 19 септември во 19.30 часот ќе се прикажува во киното „Мис Стон“ во Прилеп.
Се работи за политички трилер којшто ја следи приказната на новинарка, која опседната со исчезнувањето на најдобрата пријателка подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.
Филмот во својата богата меѓународна фестивалска година заобиколи пет континенти со 32 селекции и 10 освоени награди.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е финансиран од Агенцијата за филм.
